हलिं नेवाः तःमुँज्याया पाहांपिलिसे येँय् सहलह

wno-followupवंगु अक्टोबरय् लण्डनय् जूगु विश्व नेवाः सम्मेलनय् ब्वति कयादीपिं नेवाः न्ह्यलुवा व उगु हे इलय् येँय् जूगु टेलि कन्फरेन्सय् ब्वति कयादीपिं नेवाः व्यक्तित्वपिनि दथुइ नकतिनि छगू ‘फलोअप मुँज्या’ जुल। वर्ल्ड नेवाः अर्गनाइजेशनया न्वकु सुवर्ण बज्राचार्यया सभापतित्वय् न्ह्याःगु उगु ज्याझ्वलय् आः निक्वःगु विश्व सम्मेलन गन याये माली व अर्गनाइजेशनयात गुकथं निरन्तरता बी माली धइगु विषयय् सहलह जूगु खः ।

ज्याझ्वलय् न्ववासें सभापति बज्राचार्यं उगु सम्मेलनं ब्वतिया ल्याः म्हो जूसां सफल जूगु खँ कनादिल। वय्कलं नीस्वने धुंकूगु संस्थायात गुकथं निरन्तरता बीगु धइगु खँय् बः बियादिल। लिसें विदेशय् च्वंपिं नेवाःतय्त नेवाः म्हसीका नेपालय् हे दु धइगु खँ क्यने फःसा अर्गनाइजेशनया महत्व दइ धयादिल ।

संस्थाया संरक्षक पद्मरत्न तुलाधरं विश्व नेवाः सम्मेलन न्ह्याःगु हे तःधंगु उपलब्धी खः धयादिल। उगु ज्याझ्वलय् मनूत अलमले जुयाः मवःगु वा प्रचार मगाःगु खः धइगु खँय् ध्यान बीमाः धासें वय्कलं थुगु संस्था विदेशय् च्वंपिं नेवाःतय्गु जक संस्था खः लाकि नेपाःयापिं नं दुथ्याःगु संस्था खः धइगु स्पष्ट जुइमाःगु अले संगठन अन्तर्राष्ट्रियकरणया नापं क्वातुइ नं माःगु बिचाः प्वंकादिल। वय्कलं मेगु सम्मेलन अमेरिकाय् जुइमाःगु बिचाः नं तयादिल ।

लण्डन सम्मेलनय् ब्वति कयादीम्ह डा. महेशमान श्रेष्ठं उगु संस्थां आम नेवाःत दथुइ दुहां वनेगु कुतः यायेमाःगु खँ कनादिल। वय्कलं पिनेयापिं नेवाःतय्त नेपालभाषा ब्वंकेगु व संस्कृति ल्यंकेगु निंतिं पासा पुचः गुथि युकें बिचाः यायेमाःगु, देय्पतिकं कचा नीस्वनेगु, नेवाःतय्गु हक, हित दक्वं नेवाःत दुथ्यायेमाःगु नापं लिपाया सम्मेलन नेपालय् हे जुइमाःगु बिचाः प्वंकादिल ।

देशं देशय् कचा नीस्वनेगु वा थीथी देशय् च्वंगु कचां संस्थानाप स्वाना वनेगु धइगु खँ स्पष्ट जुइमाःगु, अलग्ग हे कचा दयेकाः वनेगु खःसा नेपाःया नेवाःतय्गु मुद्दा छु खः धकाः स्पष्ट यानाः न्ह्यःने तयाः वनेमाःगु व नेपाःयापिंसं थुगु संस्थायात समर्थन यानाच्वंगु जुयाः नेपाः व थ्व संस्था नापं वनेगु खँ स्पष्ट जुइमाःगु बिचाः नं वय्कलं कनादिल।

नेपालभाषा मंकाः खलः यलया नायः किरण शाक्यं नेवाः देय् दबू व विश्व नेवाः संगठन सहकार्य यानाः वनेमाःगु, संगठनय् व्यक्तिगत वा पुचःया नेतृत्व जुइ धइगु स्पष्ट जुइमाःगु, विधानया विषयय् स्पष्ट जुइमाःगु, निदँ लिपा धायेबलय् यक्व हिउपाः वयेफुगु जुयाः आवंनिसें हे सम्मेलनया खँ क्वःछी हथाय् मजू धयादिल ।

हरिबहादुर कर्माचार्यं निक्वःगु सम्मेलन नेपालय् हे जुइमाःगु खँय् बः बिसें आवंनिसें हे तयारी यायेमाःगु खँ कनादिल। अथे हे मंकाः खलः यलया पुलांम्ह नायः सुरेश प्रधानं हेड अफिस गन तयेगु धइगु खँ क्वःजीमाःगु नापं नेपाःया प्रतिनिधित्व अप्वः जुल धाःसा संगठन क्वातुइगु खँ कनादिल। ज्याझ्वलय् विश्वनाथ श्रेष्ठं संस्थाया प्रचार प्रसारय् अप्वः बः बीमाःगु खँ कनादिल। आदर्श तुलाधरं पासा पुचःयात माओवादीतय्गु पुचः खः धकाः द्वपं बियाच्वंगु खँ तयादिलसा उकियात कयाः युकें हे बांलाक लिसः बीधुंकूगु खँ अजय श्रेष्ठं कनादिल। स्वयम्भु तुलाधरं गुगुं नं संगठनयात राजनीतिकरण याये मजिउगु बिचाः प्वंकादिल ।

ज्याझ्वलय् बीगु झ्वलय् संगठनया दुजः डा. विजय सैंजुं सम्मेलन निदँ लिपा जुइगुलिं आवंनिसें अलमल मजुसे समझदारीया दुने च्वनाः न्ह्यज्यायेमाःगु बिचाः प्वंकादिल। वय्कलं सम्मेलन जूगु इलय् ब्वति काःपिनिगु ल्याः यक्व मदुसां कार्यसमितिइ नीन्यागू देय्या प्रतिनिधित दुथ्याःगु खँ कनादिल। आः याकनं हे नेवाः न्ह्यलुवाः व नेवाः व्यापारीत जानाः छगू पुचः नीस्वनाः सहलह यानाः जक निक्वःगु सम्मेलन गन यायेगु धइगु बारे निर्णय यायेगु जुइ धासें निक्वःगु विश्व नेवाः सम्मेलन नेपालय् हे जुइगु सम्भावना धाःसा अप्वः दुगु खँ नं कनादिल ।

श्रोत – सन्ध्या टाइम्स (http://www.nepalmandal.com/content/18008.html)