प्रेश वक्तव्य – मांभाय् दिवस

mother-language-day

झिंप्यक्वःगु अन्तर्रराष्ट्रिय मांभाय् दिवसया लसताय् मांभाय् प्रेमी सकसितं दुगुगलंनिसें भिंतुना देछाना च्वना ।

देश लोकतन्त्रय् वनाः नं आम जनतां थुकिया अनुभूति यायेफुगु मदुनि । छखे राजनैतिक अस्थीरता कायम हे तिनि सा मेखे सामान्य भाषिक समानता तकं मदयाः शोषित व अल्पसंख्यक जनतात भाषिक अधिकारपाखें वञ्चित हे जुया च्वनेमाःगु अवस्था दु । शैक्षिक ख्यलय् मांभासं शिक्षाया पुलांगु मागयात पूवंकेत पलाः ल्व्हनेगु छखे तयाः लोकतन्त्रया न्हूगु शैक्षिक प्रणालीइ नं एसएलसीइ कम्प्यूटर विज्ञानया विकल्पय् जक मांभाय् विषय तया बिइगु ज्या थुकिया ज्वलन्त उदाहरण खः ।

थौं भाषिक समानताया लागि झी सकलें दनेमाःगु दु । मांभाय् दिवसया थ्व न्हिं झीत भाषिक अधिकार प्राप्तिया लागि उत्प्रेरित यायेमा धकाः सकसितं भिंतुना च्वना ।

सुभाय् ।