नेवाः समस्या बारे सहलह
याकनं यायेगु धकाः प्रस्तावि विश्व नेवाः सम्मेलनया तयारी कथं म्हीग आइतवाः विश्वया थीथी देशय् च्वनाच्वंपिं नेवाः कार्यकर्ता दथुइ छगू हे इलय् टेलि कन्फरेन्स जुल। गुगुं नं नेवाः सरोकारया विषययात कयाः विश्वया थीथी देशय् च्वनाच्वंपिं नेवाःतय् दथुइ थज्याःगु टेलि कन्फरेन्स जूगु थ्वहे न्हापांखुसी खः ।
कन्फरेन्सय् नेपाः लगायत अमेरिकाया च्यागू राज्य, क्यानाडा, बेलायत, बंगलादेश, सिक्किम, युएई, नेदरल्याण्ड, जर्मनी आदि देशय् च्वंपिं स्वीम्ह ति नेवाःतय्सं ब्वति कासें नेवाःतय् वर्तमान समस्या, उकिया समाधान व वर्ल्ड नेवाः अर्गनाइजेशन बारे थःपिनि बिचाः प्वंकूगु खः ।
आइतवाः नेपाःया ई कथं सनिलया ६ बजे डा. रोशन श्रेष्ठ मोडरेटर जुयाः उगु कन्फरेन्स न्ह्याकादीगु खः। उकी न्ववानादीपिं मनूत गुगु देशयाम्ह खः धइगु म्हसीका कालबिल यासें खँल्हाबल्हा न्ह्याःगु खः ।
ब्वति काःपिं सकसितं लसकुस यासें अमेरिकाया दया शाक्यं विश्व न्यंकं च्वंपिं नेवाःतय्त छथाय् हयेगु ताः तयाः थ्व ज्याझ्वः जुयाच्वंगु खँ कनादिल। त्रिभुवन तुलाधरं विश्व नेवाः संगठन व नेवाः सम्मेलन यायेगु बारे छगू दशक न्ह्यवंनिसें हे कुतः जुयाच्वंगु खँ कनादिल ।
उकी दकलय् न्हापां थःगु बिचाः तसें सिक्किमया कल्पना प्रधानं सिक्किमया सवालय् अनया नेवाःतय् आर्थिक अवस्था थकायेमाःगु हे थौंया मू समस्या जुयाच्वंगु खँ कनादिल। अष्ट्रेलियाया निलम श्रेष्ठं अन ‘गुथि अष्ट्रेलिया’ धाःगु छगू संस्था चायेकाबलय् हे यक्व समस्यात वःगु खँ कँसें झन् विश्व नेवाः संगठन चायेकेबलय् यक्व हे समस्या वयेफुगु जूगुलिं दृष्टिकोण स्पष्ट जुइमाः धयादिल। कृष्ण चखुं पिने देशय् च्वंपिं नेवाःतय् भूमिका सल्लाहकारी व आर्थिक ग्वाहालि बीगु कथं जुइमाः धयादिल। सुचित्र बहादुर श्रेष्ठं विश्व नेवाः संगठन समावेशी व योजनावद्ध रुपं न्ह्याः वनेमाः धासें थुकी न्हूगु पुस्तायात नं दुथ्याकाः शिक्षा, स्वास्थ्य व आर्थिक लागाय् ज्या यायेमाः धयादिल। आदित्यमान श्रेष्ठं नेवाः संस्कृतिया धाथें उत्थान यायेगु खःसा विश्व नेवाः संगठन न्ह्यलुवाः जुयाः न्ह्यायेमाः धयादिल। अमेरिकाया सुभाषराम प्रजापतिं थीथी ख्यलय् ज्या यानाच्वंपिं नेवाः विशेषतय्गु ज्ञान व सीपयात नेवाः ख्यलय् सदुपयोग यायेमाःगु बिचाः प्वंकादिल। विनोद साय्मिं नेवाःत राजनीतिक रुपं नं सवल जुया वनेमाःगु खँ कनादिल। रहेना श्रेष्ठं थम्हं आर्थिक ग्वाहालि व जिम्मेवारी इना कायेमाःगु खँय् बः बियादिल। डा. बालगोपाल श्रेष्ठं थीथी देशय् च्वंगु नेवाः संगठनतलिसे स्वापू क्वातुकाः नेवाः एकता न्ह्यब्वयेमाःगु दु धयादिल। नेपाःया सुनिता राजभण्डारीं नेपालय् ग्रास रुटंनिसें हे ज्या याना वनेमाःगु बिचाः प्वंकादिल। रजत राजभण्डारीं नेवाः म्हसीका कायम यायेत सफू पिथनाः वा स्कूल चायेकाः ज्या याना वनेमाःगु बिचाः तयादिल ।
मेगु छुं वाः लिपा हानं थज्याःगु हे कन्फरेन्स यायेगु क्वःछिसें वकुन्हुया कन्फरेन्स क्वचायेकूगु खः ।