येँ महानगरपालिकाया भेदभावपूर्ण रोजगारी नीति खारेज यायेमाःगु व येँया आदिवासी नेवाःतप्रति निर्दयी प्रहरी दमन बन्द यायेमाःगु माग
येँ महानगरपालिकाय् स्वच्छ व समावेशी रोजगार अवसरया लागि छुं ई न्ह्यव जूगु आदिवासी नेवाःतय् शान्तिपूर्ण प्रदर्शनय् प्रहरी दमन व निर्दयता सम्वन्धय् विश्वन्यंकया नेवाः खलःपुचः व सम्वद्ध नेपाःमिपिनिगु प्रतिनिधित्व यासें वर्ल्ड नेवाः अर्गनाइजेशनपाखें प्रेस वक्तव्य पिथनाः ध्यान केन्द्रित याःगु दु ।
वक्तव्यय् देय्या संरक्षणय् प्रतिवद्ध नेपालया सरकार व येँ महानगरपालिकाया मनोनीत कार्यकारी प्रमुख अन्तर्गत प्रहरीपाखें नेपाःया आदिवासी नेवाःतप्रति जूगु अनुचित बर्बरताया घोर भत्सर्ना याःगु दुसा ज्वनातःपिं सकलें कार्यकर्तातय्त याकनं त्वःतेत माग नं याःगु दु । अथे हे राजनैतिक रुपं गैरलोकतान्त्रिक व समाजिक रुपं अन्यायपूर्ण नीति व प्रहरी बलया प्रयोग तत्काल दिके माःगुलिइ बः बियातःगु दु ।
नेवाः स्वायत्त राज्य मंकाः संघर्ष समितिपाखें ल्ह्वंगु पलाःप्रति ऐक्यवद्धता प्वंकूसें सन् २००७ य् जूगु अपारदर्शी आंशिक परीक्षा खारेज यायेमाःगु माग अर्गनाइजेशनं याःगु दु ।
संघर्ष समितिपाखें न्ह्यब्वःगु पाँचबुँदे मागप्रति संवेदनशील जुयाः माग पूवंकेत व केन्द्रीय व स्थानिय तहलय् दुगु भेदभावपूर्ण व्यवहार व नीति अविलम्व खारेज यायेगु लिसें येँ महानगरपालिकाया मनोनीत प्रमुखयात यथाशीघ्र लित सःतेत व स्थानिय निर्वाचन याकनं न्ह्याकेत नं वक्तव्य मार्फत वर्ल्ड नेवाः अर्गनाइजेशनं माग याःगु दु ।
श्रोत –