‘लण्डन वनेनु, झीगु सः हलिमय् थ्वयेकेनु’ धइगु नारा थ्वयेकाः विश्व नेवाः संगठन (वर्ल्ड नेवाः अर्गनाइजेशन)या न्हापांगु तःमुँज्या लण्डनय् जुइगु जूगु दु । विश्व नेवाः संगठन व पासा पुचः गुथि यू.के.या मंकाः ग्वसालय् वइगु अक्टोबर २९, ३० व ३१ तारिख कुन्हु तःमुँज्या जुइत्यंगु खः ।
नेवाः भाय्, संस्कृति व इतिहासयात ल्यंकातयेगु निंतिं हलिंन्यंक च्वनाच्वंपिं नेवाःत छथाय् हे मुनाः थःगु जातिय उत्थान यायेगु ताः तयाः विश्व नेवाः संगठनया न्हापांगु तःमुँज्या जुइत्यंगु खः ।
तःमुँज्याया न्हापांगु न्हि उलेज्या नापं न्हापांगु विश्वः नेवाः सहलह मुँज्या, लण्डन घोषणाया बारे सहलह, विश्व नेवाः संगठनया संविधानया बारे सहलह याइगु ज्याझ्वः दु । अथेहे निन्हुया न्हि लण्डन घोषणपत्र जारी, साहित्य सम्मेलन, सांस्कृतिक ज्याझ्वः व लिपांगु न्हि लण्डनया थीथी ऐतिहासिक थाय् म्हसिकेगु ज्याझ्वः तयातःगु दु ।
लण्डनय् स्वन्हुन्यंक यायेत्यंगु न्हापांगु तःमुँज्याया निंतिं ताः ई न्ह्यः निसें विश्व नेवाः संगठन तदर्थ समिति सक्रिय जुयाच्वंगु खः । वंगु अगस्त २१ तारिख कुन्हु विश्व नेवाः संगठन नीस्वनेत दयारत्न शाक्यया नेतृत्वय् तदर्थ समिति नीस्वंगु खः ।
श्रोत –