गोरखापत्र न्हिपाैया प्रधान सम्पादकय् पुष्कर माथेमा

pushkar-mathema-gorkhapatraवर्ल्ड नेवाः अर्गनाइजेशन नेपाः कवःया दांभरिं वरिष्ठ पत्रकार पुष्कर माथेमायात गोरखापत्र संस्थान व्यवस्थापनं गोरखापत्र न्हिपाैया प्रधान सम्पादकया जिम्मेवारी ब्यूगु दु । पुस २० गते सोमबारंनिसें लागू जुइगु यानाः वय्‌कःयात थुगु जिम्मेवारी ब्यूगु खः ।

प्रधान सम्पादकया जिम्मेवारी न्ह्यव गोरखापत्र अनलाइनया प्रमुखया रूपय् ज्या याना वया च्वनादीम्ह कार्यरत माथेमा थ्व स्वयां न्ह्यः नं गोरखापत्र दैनिक व दि राइजिङ नेपालया प्रधान सम्पादकया जिम्मेवारी काये धुंकूगु दु । माथेमा गोरखापत्रया सह–प्रकाशन युवामञ्च लय्‌पाैया सम्पादकसमेत जुइधुंकूगु दु ।

वंगु ३० दँनिसें नेपाली पत्रकारिता ख्यलय् क्रियाशील माथेमा २०४५ साल जेठ १८ गते गोरखापत्र संस्थानया नेपाली समूहया उप–सम्पादक जुयाः सेवा प्रवेश यानादीगु खः । जर्मनीस्थित इण्टरनेशनल इन्स्टिच्यूट अफ जर्नलिज्म, डेनिस स्कुल अफ जर्नलिज्म व नेपाल प्रेस इन्स्टिच्यूटपाखें पत्रकारिता प्रशिक्षण कयादीम्ह वय्‌कलं वातावरण पत्रकारिता पुरस्कारलिसें रङ्गमञ्च व साहित्य सम्बन्धी थीथी सिरपा नं त्याकादीगु दु । वय्‌कः नेपालभाषाया सफलम्ह कलाकार व च्वमि खः ।