नेवाःतय्सं भाय् संरक्षणयात महत्व बीमाः : गेल्नर

MON JUN 20, 2011

david
नेवाः भाय् व संस्कृति सम्बन्धी विज्ञ नापं अक्सफर्ड विश्वविद्यालयय् सामाजिक मानवशास्त्रया प्रोफेसर डा. डेभिड गेल्नरं नेवाःतय्सं थःगु मांभाय् संरक्षण यायेगु ज्यायात महत्व बीमाःगु खँ धयादीगु दु । वय्कलं स्वनिगः दुने च्वंपिं ५० प्रतिशत नेवाःतय् छेँय् न्हूगु पुस्तायात नेवाः भाय् मस्यनेधुंकूगु धयादिल ।

वर्ल्ड नेवाः अर्गनाइजेशनं स्काइप कन्फ्रेन्सकल मार्फत आइतवाः ग्वसाःग्वःगु सहलह मुँज्या झ्वलय् वय्कलं यदि न्हूगु नेपालय् नेवाःतय् पोजिसन बल्लाकेगु खःसा राजनीतिइ स्वयां भाय् संरक्षणपाखे नेवाःतय्सं ध्यान बीमाःगु धयादिल । थः लिप्पांगु खुसी नेपाः वनागु इलय् नेवाः मस्तय्त नेवाः भाय् स्यनेगु निंतिं स्यनेकुथी चायेकाः ज्या न्ह्याकाच्वंगु प्रति लसता प्वंकादिसें थज्याःगु हे पहल जुयाच्वंसाः न्हूगु पुस्ताय् नं नेवाः भाय्या बांलागु भविष्य दुगु धयादिल ।

अथेहे उगु इलय् कन्फ्रेन्सकलय् ब्वति काःपिंसं संघीयताया बारे न्यंगु न्ह्यसलय् प्रोफेसर गेल्नरं यदि नेपालय् बांलाक संघीयता लागू जूसाः थुगु व्यवस्था सफल जूगुइ विश्वास प्वंकादिल । तर वय्कलं संघीयता बांलाक नालाय्गु निंतिं होमवर्कया अभाव जूगु धयादिल ।

समाजशास्त्री गेल्नरं नेपाःया राजनीति पहिचाननाप स्वनावंगु धयादिसें संघीयताया छगू आधार पहिचान नं जूगु धयादिल । वय्कलं न्हूगु नेपालय् नेवाःत व तामाङत छथाय् हे च्वनाः छगू तःधंगु प्रदेश दयेकेफुसाः समग्र क्षेत्र व निगूलिं पक्षयात बांलाइगु बिचाः तयादिल ।

कन्फ्रेन्सकलय् भाजु गेल्नरं थीथी देशय् च्वनाच्वंपिं नेवाःतय्सं न्यंगु न्ह्यसःया लिसः बियादीगु खः । वर्ल्ड नेवाः अर्गनाइजेशन तदर्थ समितिया नायः दाया शाक्यं लसकुस यानादीगु ज्याझ्वलय् डा. बालगोपाल श्रेष्ठं सहजकर्ताया भूमिका म्हितादीगु खः ।

श्रोत –

http://www.nepalmandal.com/content/14744.html