प्रेस पिथना
हलिं नेवाः दबूया ग्वसालय् निक्वगू ‘हलिं नेवाः न्ह्यसः लिसः कासा ११४३’ (World Newah Quiz Contest 2023) थ्व हे ने.सं. ११४३ गुंलाथ्व तृतिया, ईश्वी संवत् १९ अगस्ट, २०२३ (२०८० भदौ २) शनिवाःनिसें शुरु जुइत्यंगु दु । प्रविधिया माध्यमं जुइगु थ्व कासाय् ब्वति कायेत नेपाःलिसें विश्वया हरेक देशय् च्वंपिं झिंनिगू तगिंतकया ब्वँमिपिं (१८ दँ तक दुपिं) जुइमाः ।
कासाय् ब्वति काये योग्यपिंसं विश्व नेवाः संगठन (World Newah Organization) या वेबसाइट www.worldnewah.org लय् वनाः वइगु ने.सं. ११४३ अनलागा: एकादशि, ईश्वी संवत् १२ अगस्ट, २०२३ दुने क्वःछिनातःगु शुल्क पुलाः फाराम जायेकादीफइ । कासाय् ब्वति कायेत नेपाः दुनेया छगू पुचःया निंतिं ने.रू. १,०००/- (द्वःछि का) व नेपालं पिनेच्वंगु छगू पुचःया निंतिं २५ अमेरिकी डलर शुल्क पुलेमाः ।
कासाय् मुक्कं स्वीनिगू पुचःयात जक दुथ्याकेगु जुइ । ब्वति काइगु पुचःयात समूह विभाजन यानाः छगू समूहय् प्यंगू पुचः दुथ्याकाः कासा यायेगु जुइ । न्हापांगु चरणय् उत्कृष्ट निगू पुचः (न्हापं व ल्यु) निगूगु चरणय् वनी । निगूगु चरणय् उत्कृष्ट छगू पुचः स्वंगूगु चरणय् दुहां वनी । उकी नं उत्कृष्ट जुइत ताःलाःगु पुचः बिजं कासा (फाइनल)य् दुहां वनीगु व दकलय् लिपा प्यंगू पुचःया दथुइ जुइगु बिजं कासाय् न्हापं, ल्यु, लियां ल्यु, हःपाः सिरपाः त्याकेत ताःलाःपिंत नगद सिरपाः बीगु जुइ ।
बिजं कासाय् न्हापयात १,००० अमेरिकी डलर, लिउयात ८०० अमेरिकी डलर, लियांलिउयात ६०० अमेरिकी डलर व हःपाःयात ४०० अमेरिकी डलर सिरपाः बीगु जुइ । कासा पतिकं त्याकामि पुच:यात ८० अमेरिकी डलर सिरपाः बीगु न जुइ ।
हलिं नेवा: न्ह्यस: लिस: कासा ११४३ या नियमत: स्वयेत थन तियादिसँ
हलिं नेवा: न्ह्यस: लिस: कासा ११४३ या टाईशीट या नितिं थन तियादिसँ
प्रचारप्रसार समिति
हलिं नेवाः न्ह्यसः लिसः कासा ११४३