Watch the full video here.
मा. जगतसुन्दर मल्लया १४१ क्वःगु बुन्हिया लसताय् मांभासं शिक्षा विषयक सहलह मुँज्या
नेपालभाषाया प्यंगः थां मध्ये छगः थां मास्टर जगतसुन्दर मल्लया १४१ क्वःगु बुन्हिया लसताय् हलिं नेवाः दबू, केन्द्रीय समितिया ग्वसालय् जूमपाखें वंगु ने.सं. ११४३ कौलागा त्रयोदशी क्वःपुजा खुन्हु (नोभेम्वर ११) मांभासं शिक्षाया विषयस सहलह मुँज्या जुल । हलिं नेवाः दबूया केन्द्रीय नायः भाजु संयुक्त श्रेष्ठजुं मास्टर जगतसुन्दर मल्लया किपाया न्ह्यःने न्हूगु प्रविधि छ्यलाः कम्प्यूटर प्रोग्रामपाखें त्वाःदेवाय् मत च्याकाः उलेज्या यानाः न्ह्याःगु उगु सहलह मुँज्याय् पाहां पाटन क्याम्पसया न्हापायाम्ह नेपालभाषा विभागीय प्रमुख सहप्राध्यापक तुल्सिलाल सिंहजुं मास्टर जगतसुन्दर मल्लं उगु इलय् न्ह्याकादीगु मांभाय्या शिक्षाया अभियानयात आः झीपिं सकलें जानाः सफल यायेमाःगु खँ प्वंकादिल लिसें वय्कलं यल महानगरपाखें वय्कःया न्ह्यलुवाःसुइ आः नकतिनि तयार जूगु स्थानीय विषयया नेपालभाषा पाठ्य सपूmया मर्मया बारे थःगु खँ दुग्येक न्ह्यब्वयादिल । यल महानगरपाखें नर्सरी केजिं निसें तगिं स्वंगू तकया निंतिं पाठ्य सपूm तयार जूगु खँ नं वय्कलं जानकारी बियादिल । थुकथं हे मेम्ह पाहां मांभाय् शिक्षाया अभियन्ता पुलांम्ह प्रधानाध्यापिका मय्जु विद्या चित्रकारजुं येँ महानगरपालिकां स्थानीय विषयस नेपालभाषां ब्वंकाच्वंगु शिक्षाया गतिविधि दुग्येक न्ह्यब्वयादिल । येँ महानगर पालिकाया शिक्षा कवःया विज्ञ कथं नं ज्या यानाच्वनादीम्ह चित्रकारजुं येँ महानगर पालिका नेपालभाषां ब्वंका वयाच्वंगु स्थानीय विषय तसकं सफल जुजुं वनाच्वंगु खँ न्ह्यथनालि । थुगु ज्याझ्वलय् मेम्ह पाहां दबूया साहित्यिक एम्वेसदर लोककवि राजभाइ जकःमिजुं मास्टर जगतसुन्दर मल्लया व्यक्तित्व व कृतित्व दुथ्याःगु चिनाखँ ब्वना न्यंकादीगु खः । हलिं नेवाः दबूया न्वकू समन्त वज्राचार्यजुं सुभाय् द्यछानादीगु व दुजः डा. नरेश शाक्यजुं सहजीकरणया भूमिका म्हितादीगु थ्व ज्याझ्वलय् मल्ल (प्रधानांगं) प्रतिस्थानया न्वकू राजाराम प्रधाननांगजुं व आर.आर. क्याम्पसया ब्वनामि रिदेन महर्जनजुपिनिसं नं मांभाय्या शिक्षाया खँय् थःपिनिगु नुगःखँ प्वंकादीगु खः ।