वर्ल्ड नेवाः अर्गनाईजेशन जापानया न्हापांगु जापान सम्मेलन छगू लख तकाया ‘मचा सिरपाः’ घोषणा यासें क्वचाःगुु दु । नेपाल संवत् ११३७ न्हूदँया लसताय् नागानोकेनया तातेसिना रिजोर्ट होटलय् निन्हुतक न्ह्याःगु थीथी ज्याझ्वत मध्ये निन्हुया दिं नोभेम्बर ६ तारिखया दिं जूगु जापान सम्मेलनं ७ बुँदे पौ जारी याःगु खः ।
झीगु भाषा संस्कृति धैगु हे नेपाःया तिसा जूगुलिं उकियात उत्थान व प्रबद्र्धन यायेगु सकल नेपाःमिपिनिगु दायित्व जूगु खँय् बः बिसें उगु सम्मेलन क्वचायेकूगु खः ।उगु सम्मेलनय् एनआरएन जापानया संस्थापक नायः राजन प्रधानाङ्ग, सिटी एक्सप्रेस एण्ड ट्राभल्सया प्रबन्धक महेश श्रेष्ठ, नेपालभाषा प्रस्ट न्वःवायेफुम्ह जापनिज ब्यांचा दाई, रामेछाप जापान समाजया प्रमुख सल्लाहकार तोचिगी केनपाखें सुरेन्द्रलाल श्रेष्ठ, ओकिनावा प्रतिनिधि नारायण जोशीपिन्सं थःथःगु धारणात न्ह्यब्वयादीगु खः ।
अथेहे, कास्की पोखरा समाजया बरिष्ठ सल्लाहकार प्रकाशलाल श्रेष्ठ, रामेछाप समाज जापानया नायः उत्तम श्रेष्ठ, पर्वत समाज जापानया नायः ईश्वर जोशी, नेवाः जागरण मञ्च जापानया नायः जनकराज शाक्य, नेवाः गुथि जापानया संस्थापक नायः सकुल प्रजापति, वर्ल्ड नेवाः अर्गनाईजेशन जापानया सल्लाहकार अनिलकुमार शाक्य, संस्थाया सह–संयोजक इन्दिरा सुजुकी राजभण्डारी, एनआरएन जापानया दुजः सबिता श्रेष्ठपिन्सं नेपाल संवत् ११३७ या लसताय् सकल नेपाःमिपिनिगु उत्तरोत्तर प्रगतिया भिंतुना बियादीगु खः । उगु सम्मेलनय् कानाजवापाखें रोहित शिल्पकार व समृति बज्राचार्य, फुकुशिमापाखें सरस्वती मानन्धर व मिनोरु ताकागी, तोचिगीपाखें सुरेन्द्रलाल श्रेष्ठ, ओकिनावापाखें नारायण जोशी व वय्कःया छेँजः, नागानो केनपाखें सुमेश शाक्य व मेपिं पासापिं टोकियोया थीथी थासं सहभागी जूगु खः ।
छगू लख तकाया मचा सिरपा घोषणा
मचातय्त मातृभाषाया माध्यमं ब्वंकेमाः धैगु आज्जुया लिसें वंगु ८ दँ न्ह्यःनिसें ‘नेवाः वस्ती नेवाः स्कुल अभियान’या अवधारणायात समर्थन व ग्वाहालि यायेगु आज्जुं सुनिलकुमार शाक्यया संयोजकत्वय् ‘मचा सिरपाः’ घोषणा याःगु खः । नेपालभाषा ब्वनीपिं मचातय्गु नितिं थीथी विधाय् बिइगु थुगु सिरपाः दुने मुक्कं १ लख तका दां बराबरया रकम दँय् दसं लःल्हाइगु जूगु दु । ‘नेवाः वस्ती नेवाः स्कुल’ अभियानया संयोजक दिपक तुलाधरं नेपालभाषाय् वयस्कया नितिं आपालं सिरपाःत दूगु धयादिल । तर मचातय्गु नितिं खास हे सिरपाः मदूगुलिं मचातय्त थःगु मातृभाषा व संस्कृतिप्रति आकर्षित यायेगु नितिं थुज्वःगु सिरपाःया आवश्यकता दूगु जानकारी बियादिल । डब्ल्यू एन ओ जापानया सुनिलकुमार शाक्यं आर्थिक संयोजन याइगु उगु ‘मचा सिरपाः’या व्यवस्थापन ‘नेवाः वस्ती नेवाः स्कुल अभियान’ अन्तर्गतया समितिं याइगु धाःगु दु । उगु ‘मचा सिरपाः’या नितिं आर्थिक ग्वाहालि प्रतिबद्धता प्वंकेगु झ्वलय् नेपाःपाखें भूतपूर्व वातावरण मन्त्री डा. केशममान शाक्यं झिद्वः तका, पुष्कर माथेमां झिद्वः तका व भैरव ज्वेलरी न्यूरोडया प्रदिपमान ताम्राकारं झिद्वः तका ग्वाहालि यायेगु प्रतिबद्धता प्वंकूगु दु । अथेहे, अमेरिकापाखें दयारत्न शाक्यं झिद्वः तका, सिजन श्रेष्ठं झिद्वः तका, सुभाष प्रजापतिं झिद्वः तका, रत्नकाजी शाक्यं झिद्वः तका ग्वाहालि यायेगु प्रतिबद्धता प्वंकूगु दु । थ्वहे झ्वलय् नेदरल्याण्डपाखें बालगोपाल श्रेष्ठं झिद्वः तका, बंगलादेशपाखें कृष्ण चखुंपाखें झिद्वः तका, पोर्चुगलपाखें स्वयम्भूधर तुलाधरपाखें झिद्वः तका व ज्योति तुलाधरं झिद्वः तका ग्वाहालि याइगु जानकारी ब्यूगु दु । ग्वाहालिया हे नितिं जापानपाखें प्रा.डा. केशब महर्जनं झिद्वः तका, सुनिलकुमार शाक्यं झिद्वः तका, जनकराज शाक्यं झिद्वः तका, रामभक्त जोशीं झिद्वः तका व इन्दिरा सुजुकी राजभण्डारीं झिद्वः तका ग्वाहालि यायेगु प्रतिबद्धता प्वंकूगु दु । लिसें संस्थां थुकिया नितिं ग्वाहालि याये मदुपिन्त वर्ल्ड नेवाः अर्गनाईजेशन जापानय् स्वापू तयेत इनाप याःगु दु ।
जापान सम्मेलन २०१६ य् जारी जूगु मू बुँदात
– ‘मचा सिरपाः’ व्यवस्थित यानाः निरन्तरता बिइगु ।
– नेवाः कलाकारपिन्त प्रोत्साहन यायेगु ।
– संसार न्यंकंया स्थानीय रुपं दुपिं नेवाः व नेवाः संस्थापिनिगु नेट वर्किङ यायेगु ।
– नेवाः संस्थातसें यानाच्वंगु नेवाः संस्कृति व संस्कारयात टेवा बिइगु ।
– वर्ल्ड नेवाः अर्गनाईजेशनं संसार न्यंकं छरे जुयाच्वंपिं नेवाः व नेवाः संगठनयात छथासं तयेगु ।
– नेवाःया संस्कृति धैगु हे नेपाःया संस्कृति खः, आः वयाः नेपाःमिया जक मजूसे युनेस्को वर्ल्ड हेरिटेजय् दर्ता जूगु झीगु पूर्खां दयेकाः थकूगु सांस्कृतिक धरोहरत सकल विश्व मानव जातिया हे सम्पत्ति जूवःगु दु । गुगु झी सकस्यां संरक्षण व सम्बद्र्धन यायेगु दायित्व बोध याकेबीगु ।
– आर्थिक ग्वाहालि व नेवाः फन्ड राइजिङ यायेगु ।
मिस एण्ड मिसेज नेवाः जापानया उपाधि संगीता शाक्ययात
वर्ल्ड नेवाः अर्गनाईजेशन जापानं न्हापांगुखुसि जापानय् मिस एण्ड मिसेज नेवाः जापान ११३७ नागानो केन को तातेसिना रिजोर्ट होटलय् नोभेम्बर ६ तारिख आइतवाः छगू ज्याझ्वःया ग्वसाः ग्वयाः तःजिक क्वचायेकूगु दु ।न्हापांगु मिस एण्ड मिसेज नेवाः जापान ११३७ या उपाधि टोकियाया संगीता शाक्यं त्याकेत ताःलाःगु खः । अथेहे, निगूगु थासय् अनुस्का शाक्य व स्वंगूगु थासय् सृजना शाक्य लायेत ताःलाःगु खः ।
थ्वहे झ्वलय् प्यंगूगु थासय् सनम रंजितकार, न्यागूगु थासय् प्रमिला शाक्य, खुगूगु थासय् शर्मिला शाक्य, न्हय्गूगु थासय् खुशी डंगोल सुवेदी, च्यागूगु थासय् नेहा श्रेष्ठ, गुगूगु थासय् शर्मिला महर्जन व झिगूगु थासय् मेलिना महर्जन लाःगु खः । कासाय् ४३ म्हेस्यां धेंधेंबल्ला याःगु खः । तातेसिना नागानोया ज्याझ्वलय् रुमी शाक्य, रिया जोशी व सकुल प्रजापतिं नेवाः प्याखं व युको ओकामोतों चर्या प्याखं लिसें उकिया म्हसीका न्ह्यब्वयादीगु खः । रुकेश गोसाई नं धिमेबाजा व रोहित शिल्पकारं भूस्याः थानाः सांगितिक लकस न्ह्याइपुकादीगु खः ।
ज्याझ्वलय् नुगःखँ तसें वर्ल्ड नेवाः अर्गनाईजेशन जापानया सह–संयोजक इन्दिरा सुजुकी राजभण्डारीं नेवाःतयेगु मौलिका संस्कृति, भाषा, भेषभुषा, कला, रहनसहनया संरक्षण सम्बद्र्धन व नेवाः समुदायया मय्जुपिन्त थुकिया बारे जानकारी बियादिसें क्षमता व आत्मविश्वास अभिबृद्धिया नितिं ज्याझ्वःया ग्वसाः ग्वयागु खँ कनादिल । उगु ज्याझ्वलय् ज्याझ्वःया संयोजक सुनिलकुमार शाक्यं भाषा व संस्कृति हे हरेक जातिया मू म्हसीका जुइगु जुयाः थुकिया जगेर्ना यायेत छेँजः दुने थःगु हे मातृभाषां खँल्हायेमाःगु व संस्कृतिया बारे थः सन्ततिपिन्तं नं जानकारी बिइमाःगु खँय् बः बियादिल । अथेहे, थःगु नुगःखँ तयेगु झ्वलय् उगु ज्याझ्वःया मूपाहाँ भवन भट्टं नेवाःतय्गु मौलिक संस्कृति, भाषा, भेषभुषा नेपाःया तिसा जूगुलिं थुकियात संरक्षण व सम्बद्र्धन यायेमाःगु खँय् बः बियादिल ।
ज्याझ्वलय् एनआरएन जापानया संस्थापक नायः राजन प्रधानाङ्ग, सिटी एक्सप्रेस एण्ड ट्राभल्सया प्रबन्धक महेश श्रेष्ठ, नेपालभाषा बांलाक्क न्वःवायेसःम्ह जापनीज ब्यांचा दाई, कास्की पोखरा समाजया बरिष्ठ सल्लाहकार प्रकाशलाल श्रेष्ठ, रामेछाप समाज जापानया नायः उत्तम श्रेष्ठ, रामेछाप जापान समाजया मू सल्लाहकार सुरेन्द्रलाल श्रेष्ठ, पर्वत समाज जापानया नायः ईश्वर जोशी, नेवाः जागरण मञ्च जापानया नायः जनकराज शाक्य, नेवाः गुथि जापानया संस्थापक नायः सकुल प्रजापति, वर्ल्ड नेवाः अर्गनाईजेशन जापानया सल्लाहकार अनिलकुमार शाक्य, ओकिनावा प्रतिनिधि नारायण जोशी, संस्थाया सह–संयोजक इन्दिरा सुजुकी राजभण्डारी, एनआरएन जापानया दुजः सबिता श्रेष्ठ, कलाकारपिं युको ओकामोतो, रिया जोशी व रुमी शाक्यपिन्त खादा क्वखायेकाः हनेगु ज्या नं जूगु खः ।
उगु ज्याझ्वलय् मिस एण्ड मिसेज नेवाः जापानया उपाधि त्याकादीपिं मय्जुपिन्त महेश श्रेष्ठं दसिपौ लःल्हानादीगु खःसा मूपाहाँ भुवन भट्टं ताज पुइकाः हनेगु ज्या जूगु खः । अथेहे, राजन प्रधानाङ्गं उपाधि त्याकादीपिं मय्जुपिन्त शास लःल्हानादीगु खः । थ्वसिबें न्ह्यः धेंधेंबल्लाय् दुथ्याःपिं मय्जुपिनिगु कल्चरल फोटोसुट याःगु खः । धेंधेंबल्लाय् दुथ्याःपिं मय्जुपिनिगु फोटो अफिसियल फोटोग्राफर मनोहरलाल व नरेन्द्रकुमार शाक्यं कयादीगु खः । मिस एण्ड मिसेज नेवाः जापान ११३७ या उपाधि त्याकादीपिन्सं ३०,००० येन नगद, फस्ट रनरअपं २०,००० येन व सेकेण्ड रनरअपं १०,००० येन नगद सिरपाःलिसें दसिपौ त्याकादीगु खः । अथेहे थर्ड रनरअपनिसें टेन्थ रनरअपतकया कासामि थीथी उपहार त्याकादीगु खः ।
नागानो केनया ज्याझ्वलय् उपाधि त्याकादीपिं, फस्ट रनरअप व मेपिं विजेतापिं नं उपस्थित जुइ मफूगुलिं वय्कःपिन्त मेगु ज्याझ्वः यानाः उपहार लःल्हायेगु क्वःछ्यूगु दु । उगु दिंया ज्याझ्वलय् विजेता व फस्ट रनरअप उपस्थित जुइमफुगुलिं सेकेण्ड रनरअप, फोर्थ रनरअप व फिफ्ट रनरअपयात छसिंकथं ताज पुइकूगु खः ।
वर्ल्ड नेवाः अर्गनाईजेशन जापानया प्रतिनिधि जनकराज शाक्यं मिस एण्ड मिसेज नेवाः जापान ११३७ थःपिन्सं सोचेयानागुसिबें अतिकं बांलाक्क ताःलाःगुलिं सकल कासामिपिन्त सन्तुष्ट यायेमफूगुलिं क्षमा फ्वसें वइगु दिनय् थ्वसिबें नं व्यवस्थित रुपं ज्याझ्वःया ग्वसाः ग्वयेगु प्रतिबद्धता प्वंकादिल । अथेहे, वय्कलं नेपालभाषा व संस्कृतियात कायम यानाःतयेगु नितिं भाषा संस्कार संस्कृतिया जगेर्ना यायेत थुकिया संरक्षण व सम्बर्धन यायेत मिस एण्ड मिसेज नेवाः जापान ११३७ पाखें गहन भूमिका म्हितूगु बारे प्रष्ट यानादिल ।
उगु दिंया ज्याझ्वःया संचालन रुमी शाक्य, सम्रिता शाक्य, रोजी शाक्य व अस्मिता कार्की श्रेष्ठं यानादीगु खः ।