तःजिगु नेवाः संस्कृतिया प्रतिनिधित्व यासें हलिमय्न्यंक बसोबास याना वयाच्वंपिं नेवाःतय्गु मंकाः दिंकथं दकलय् न्हापां ग्वसाःग्वःगु हलिं नेवाः दिं २०१८ मार्च ३१या मू ज्याझ्वः कथं नेपाःया येँय् हलिं नेवाः दबूया मू ग्वसाः व हलिं नेवाः दबू नेपाः देय् मू कवः व त्रिवि नेपालभाषा केन्द्रीय विभागया मंकाः ग्वसालय् हलिंया १७ देसं झाःपिं अथेहे न्यासः प्रतिनिधितय्गु सक्रिय सहभागिताय् तःजिक मार्च ३० व ३१ यानाः निन्हुयंक सम्मपन जूगु हलिं नेवाः सम्मेलन नेवाः म्हसिका आन्दोलनय् बिस्कं महत्व दुगु ऐतिहासिक ज्याझ्वः जूगु दु । सम्मेलनय् जूगु तःजिगु सहलहया लिधंसाय् क्वय्च्वयाकथंया घोषणापत्र सम्मेलनया निष्कर्ष कथं जारी यायेगु सहमति जूगु जुल ।
१. नेवाः संस्कृति, सम्पदा, भाय्, साहित्य व समग्र पहिचानया संवद्र्धन, संरक्षन व पुनःजागरण, नेवाःतय् दथुइ एकताया सुदृढिकरणया नापनापं अन्तरराष्ट्रिय मापदण्ड कथं जातीय अधिकारया प्रत्याभूतिया निंतिं हलिंन्यंक मंकाः सः थनेत हलिं नेवाः दबूया आह्वानय् प्रत्येक मार्च लाया दकलय् लिपांगु शनिवाःयात हलिंन्यंक ‘हलिं नेवाः दिं’ कथं दँय् दसं हनेगु ।
२. विकास व आधुनिकताया नामय् नेवाः वस्ती व वासिन्दातय्त विस्थापित यायेगुया नापं नेपाःया प्रतिष्ठाकथं म्वानाच्वंगु गौरवशाली मूर्त अमूर्त सम्पदा विनाश यायेगु षड्यन्त्र थौं नं अझ तीव्र कथं जुयाच्वंगु यथार्थया अनूभुतियासें अजाःगु षड्यन्त्रकारी अतिक्रमण व दमनया तच्वकं भत्र्सना यासें अजाःगु विभेदपूर्ण असमाजिक, प्रतिगमनकारी, जनविरोधी ज्यात तुरुन्त दिकेया निंतिं सरकार, जिम्मेवार निकाय व अन्तरराष्ट्रिय समुदायपिनिगु न्ह्यःने दवाबमूलक ज्याझ्वःत सशक्त कथं न्ह्याकेगु ।
३. नेपाःया संविधानया धारा ७स खय् भाय् छगूयात जक नेपाली धया सरकारी कामकाजया भाय् जुइ धकाः धयातःगु विभेदकारी खँपूयात हीकाः नेपाः दुने ल्हाइगु नेपाःया फुक्क भाय्यात नेपाली भाय् धायेगुया नापं बिना भेदभाव सरकारी ज्याय् छ्यलेदइगु अधिकार दयेकेत सशक्त पहल यायेगु ।
४. नेपालं सन् २००७स अनुमोदन यायेधुंकूगु आईएलओ महासन्धि १६९ कथं नेपाःया ऐन कानूनया व्यवस्था यानाः कार्यान्वयन यायेगु जिम्मेवाररी नेपाल सरकारया जुयाच्वंसां व जिम्मेवारीवहन सरकारपाखें जुयामच्वंगु यथार्थया भत्र्सना यासें थ्व महासन्धिस आदिवासी जनजातिया मस्तय्त मातृभाषा शिक्षाया प्रत्याभूति यायेमाःगु, सकलें आदिवासी जनजातिया भाय्या विकास व संरक्षण यायेमाःगु, आदिवासी जनजातिपिन्त विकास निर्माण सम्बन्धी योजनाबारे पूर्वसूचित यायेमाःगु, इमित प्रभाव लाइगु सरकारी क्रियाकलापबारे इमिगु पूर्व सहमति कायेमाःगु व्यवस्था जुयाच्वंगुलिं व महासन्धि कथंया दक्वं जिम्मेवारी निर्वाह यायेत माग यानाच्वना ।
५. नेपाःया हे म्हसिकाया आधार कथं ऐतिहासिक रुपं प्रदेश नं. ३ अप्वथें भूगोलयात कयेच्याःगु नां ‘नेपालमण्डल’यात प्रदेश नं ३या नां कथं छुइमाःगु अडान कासें उकिया निंतिं माःकथं दबाबमूलक ज्याझ्वः न्ह्याकायंकेगु ।
६. नेवाः कला, संसकृति, सम्पदा, सभ्यता, भाय्, साहित्य, पत्रकारिताया विकासया निंतिं हलिंन्यंकाया मंका कुतः कथं ‘हलिं नेवाः कोष’ स्वनेगु ।
७. नेवाःतय् हकहित सम्बन्धय् नेवाःतय्सं थःम्हं हे थःयात शासन यायेदइगु स्वशासनया व्यवस्थाया निंतिं सः ततं वनेगु ।
८. तःहाकःगु इतिहास दुगु नेपालभाषाया वाङमययात क्रमशः अन्तरराष्ट्रियकरण यायां यंकेया निंतिं सक्रिय व सशक्त पहल यायेगु ।
९. सम्मेलनय् जूगु सहलहया लिधंसाय् नेवाः समुदायया वहुआयामिक विकासया निंतिं अल्पकालीन, मध्यकालीन व दीर्घकालीन नीति, रणनीति व ज्याझ्वः निर्धारण यायेगु ।